souldan

Souldan, ou Soldan, ou Sultan en langage Egyptien et Moresque, signifie Roy, Prince, et souverain seigneur d'un pays, Dominicus Marius Niger au 3. livre de sa geographie, parlant du Caire qui est au pays d'Egypte, dit que au langage du pays les Roys sont appelez Soldans. Les Turcs attribuent ce mot Sultan au Roy de Perse, disans, Sahi sultan zmail, Combien que aucunesfois ils luy donnent ce mot patissah, qui signifie Roy. L'autheur de l'histoire generale des Turcs au premier livre escrit, que au temps passé on attribuoit au seigneur du Caire le nom de Sultan, et que disant Sultan Suleiman on entend le grand Suleiman, mais que postposant ce mot Sultan, et disant Suleiman Sultan, il signifie Visultan, et Lieutenant de Sultan, comme quand nous disons Viroy ou Viceroy, mais il ne rend raison de ceste difference, et au second livre de ladite histoire, dit, que Mahomet fils de Dimbayazeth, a esté le premier de la maison et race des Ottomans qui s'est fait appeler Sultan. Sultan aussi est une espece de monnoye d'or Turquesque, qui rapporte au poix et au fin du Ducat Venitien, et vaut cinquante quatre, ou comme il dit ailleurs, cinquante cinq aspres Turquesques. Et au livre premier il dit que ces Ducats cy sont appelez Sultane, portans tels mots en l'une des faces, Ataiat Saffiat Sultan Ahamat morat chan, c'est à dire comme ledit autheur l'interprete, à l'honneur et reverence de l'ame de Sultan Mahomet conquesteur de la seigneurie de Constantinople. Et en l'autre face ceux cy, Sultan Mahomet cham, Sultan paiaxit bin, Sultan scelim Scia, Sultam hamot, Sexchi ius Sexenalti, Qui est à dire, Sultan mahomet sieur et pere de Sultan Paiaxit fils de luy, Sultan Scelim seigneur de l'estat, l'an huict cens soixante et tant d'ans, mais ceste interpretation dudit autheur n'exprime bien lesdits mots Turquesques.

Thresor de la langue françoyse. Jean Nicot.